කුරුණෑගල – දඹුල්ල මාර්ගයේ ගොකරැල්ල, දරමිටිපොළ ප්‍රදේශයේදී යතුරුපැදියක් පාරෙන් ඉවතට පැන, කාණුවකට වැටීමෙන් මීට ටික වේලාවකට පෙර තරුණයින් දෙදෙනෙකු එම ස්ථානයේදිම ජීවිතක්ෂයට පත් වී ඇති බව ගොකරැල්ල පොලිසිය තහවුරු කරයි.
කුරුණෑගල – දඹුල්ල මාර්ගයේ නවීකරණ කටයුතු මේ දිනවල සිදුකෙරෙන අතර, මෙම තරුණයින් දෙදෙ‍නා ගමන්ගත් යතුරුපැදිය ඇද වැටී ඇත්තේ අදාළ නවීකරණ කටයුතුවල යෙදී සිටින සමාගම විසින් මාර්ගය අයිනේ හාරා තිබූ අඩි කිහිපයක් ගැඹුරු කාණුවකට බව වාර්තා වෙයි.
මෙලෙස ජීවිතක්ෂයට පත් වී ඇත්තේ ගොකරැල්ල, නැෂනල් වත්ත ප්‍රදේශයේ පදිංචි තරුණයින් දෙදෙනෙකි.වයස අවුරුදු 26 සහ 23 යන වයස්වල පසුවන මෙම තරුණයින් දෙදෙනාගෙන් එක් අයෙකු හමුදා සෙබළෙකු බවද වාර්තා වෙයි.
අනතුරින් ජීවිතක්ෂයට පත් තරුණයින්ගේ මෘතශරීර මේ වන විට ගොකරැල්ල දිසා රෝහල වෙත ගෙනැවිත් ඇති අතර ඒ බව සැළ වූ නැෂනල් වත්ත ප්‍රදේශවාසීහු විශාල පිරිසක් මේ වන විට රෝහල වටා එක් රැස් වී සිටීම නිසා ඒ අවට තරමක උණුසුම් තත්වයක්ද මේ වන විට හටගෙන තිබේ.
මේ පිළිබද වැඩි විස්තර සහ ඡායාරූප ලැබුණු සැණින් ඒවා අප වෙබ් අඩවියෙහි පළකිරීමට සූදානමින් සිටිමු.
