එළඹෙන අප්‍රේල් මාසයේ සිට ගුරුවරු 33,000ක් පාසල් පද්ධතියට එක් කර ගැනීමට බලාපොරොත්තු වන බව අධ්‍යාපන අමාත්‍ය ආචර්ය සුසිල් ප්‍රේම්ජයන්ත් මහතා පාර්ලිමේන්තුවේ දී අද (22) ප්‍රකාශ කළේය.
පාර්ලිමේන්තු මන්ත්‍රී වසන්ත යාපා බණ්ඩාර මහතා යොමු කළ වාචික ප්‍රශ්නයකට පිළිතුරු දෙමින් අධ්‍යාපන අමාත්‍යවරයා මේ බව ප්‍රකාශ කළේය.
වැඩිදුරටත් අදහස් දැක් වූ අධ්‍යාපන අමාත්‍යවරයා පැවසුවේ විද්‍යපීඨ ගුරුවරුන්ගේ ප්‍රතිඵල එළඹෙන මාර්තු 30 වන විට නිකුත් කරන බවයි. ඒ අනුව එම ගුරුවරු 7500 දෙනා පළාත් පාසල් වල ගුරු හිගය අවම කිරීම සඳහා යෙදවීමට බලාපොරොත්තු වන බව අධ්‍යාපන අමාත්‍යවරයා සඳහන් කළේය.
දැනට රාජ්‍ය සේවයේ නියුතු අභ්‍යාසලාභීන් ගුරු සේවයට එක් කර ගැනීම සඳහා පැවැත්වෙන ගුරු විභාගය එළඹෙන මාර්තු 25 දින පැවැත් වේ. එම විභාගය සඳහා අයදුම්කරුවන් 53,000ක් අයදුම් කර ඇති අතර ඒ අතරින් උපාධිධාරින් 26,000ට ගුරු පත්වීමට සැළසුම් කර තිබේ. ඒ අනුව මෙම ගුරුවරු 33,000 ලබන අප්‍රේල් සිට පාසල් පද්ධතියට එක්කර ගැනීමට සැළසුම් කර තිබේ.
කොළඹ, මහනුවර, ගම්පහ වැනි ලංකාවේ ප්‍රධාන නගර ආශ්‍රිතව, පාසල් වල විෂමතාවක් ඇති වී තිබෙනව බවත් මේ හේතුවෙන් විශාල සිසුන් පිරිසක් නගර කරා එන බවත් අධ්‍යාපන අමාත්‍යවරයා පෙන්වා දුන්නේය.
ඒ සඳහා සැමට සමාන අධ්‍යාපන අවස්ථාවක් ඇති කල යුතු බවත් ඉදිරි අධ්‍යාපන ප්‍රතිසංස්කරණ යටතේ මෙම කටයුතු සිදු කරන බවද හෙතෙම සඳහන් කළේය.
news.lk
