කුරුණෑගල මහ නගර සභාවට අයත් සාප්පු සංකීර්ණවල ඇති කඩ කාමර පසුගිය කාලයේදී නිසි ක්‍රමවේදයකින් තොරව බද්දට දීමෙන් මහා නගර සභාවට විශාල මුදලක් අහිමි වී ඇති බව විගණන දෙපාර්තමේන්තුවෙන් නිකුත් කරන ලද වාර්තාවකින් පෙන්වා දී ඇතැයි දිණමිණ වෙබ් අඩවිය වාර්තා කරයි.
එහි වැඩිදුරටත් සඳහන් වෙන්නේ පිළිගත් තක්සේරු ක්‍රමවේද අනුගමනය නොකර තම හිතවතුන්ට පසුගිය කාලවලදී කුරුණෑගල මහා නගර සභාවට අයත් සාප්පු සංකීර්ණවල කඩ කාමර මෙලෙස බදු දීම හරහා විශාල මුදලක් කුරුණෑගල මහ නගර සභාවට අහිමි වී ඇතැයි කුරුණෑගල මහ නගර සභාව සඳහා නිකුත් කරන ලද 2023 විගණන වාර්තාවේ සඳහන් වන බවයි
මේ අනුව ප්‍රධාන බස්නැවතුම්පොළ, එම්.සී. ප්ලාසා වෙළෙඳ සංකීර්ණයේ ද එලෙසම ඔරලෝසු කණුව අසල දැනට ඉදිකරමින් පවතින මධ්‍යම වෙළෙඳ සංකීර්ණයේද එමෙන්ම වැහැර පොදු වෙළෙඳ සංකීර්ණයේ ද කඩ කාමර බදු දීමේදී සිදුවී ඇති අවිධිමත් ගනුදෙනු හේතුවෙන් අක්‍රමිකතා රැසක් මතුව තිබේ. මේ හේතුවෙන් මහ නගර සභාවට විශාල මුදලක් පසුගිය වසර කිහිපය පුරාවට අහිමි වී ඇති බව එම වාර්තාව මගින් හෙළිදරව් කර තිබේ.
දිනමිණ වෙබ් අඩවිය පෙන්වා දෙන පරිදි මහා නගර සභාවක, නගර සභාවක හෝ ප්‍රාදේශීය සභාවකට අයත් දේපලක් කුලී පදනම මත හෝ බදු පදනම මත ලබාදීමේදී එහි අවම ලංසු වටිනාකම ප්‍රධාන තක්සේරුකරු විසින් තක්සේරු කළ යුතුව තිබේ. නැතහොත් එකී පළාත් පාලන ආයතනය පත් කරනු ලබන සුදුසුකම්ලත් තක්සේරුකරුවෙකු විසින් එම වටිනාකම තක්සේරු කළ යුතු වේ. එහෙත් මෙහිදී එම ක්‍රමවේද හා උපදෙස් අනුගමනය නොකර ආදායම් පරීක්ෂකවරයෙකුගේ තක්සේරුවට අනුව යමින් මෙකී කඩ කාමර බදු දීම හේතුවෙන් කුරුණෑගල මහා නගර සභාවට විශාල පාඩුවක් සිදුව ඇත.
සමහර සාප්පු සංකීර්ණවල කඩ කාමර බදු දීමේදී මහ නගර සභාව හා කඩකාමර බදු ගත් තැනැත්තන් අතර එළැඹී ගිවිසුම් වලට අනුව එළඹි දින සිට මාසික කුලියක් අයකර ගත යුතුවේ. එහෙත් සමහර කඩ කාමර වලින් වසරකට ආසන්න කාලයක සිට එලෙස හිඟ මුදල් අයකර ගැනීමට පවා කුරුණෑගල මහ නගර සභාව පියවර ගෙන නොමැති වීමද ගැටලු සහගත වී තිබේ. එලෙසම කඩකාමර බදු ගැනීමේ ගිවිසුම් ගත පුද්ගලයන් වෙනුවට එම කඩ කාමර වෙනත් පුද්ගලයන් අතට පත්වීමේ සිද්ධීන් කිහිපයක්ද මෙහිදී අනාවරණය වී තිබේ.
එලෙසම දිනමිණ වෙබ් අඩවිය සඳහන් කරන පරිදි කුරුණෑගල මධ්‍යම වෙළෙඳපොළ සාප්පු සංකීර්ණයේ කඩ කාමර බදු දීමේදී බදු ලබා දීමේ ක්‍රමවේදය උල්ලංඝනය කරමින් විනිවිදභාවයෙන් තොරව ලබාදී ඇති බව හෙළි වී තිබේ. මෙය කුරුණෑගල නගර මධ්‍යයේ ඉහළ ආර්ථික වටිනාකමක් ඇති ස්ථානයකි. එනිසා එම සාප්පු සංකීර්ණය ඉහළ වටිනාකමකට බදු දීමට හැකියාව තිබේ. එලෙස හැකියාවක් තිබියදී බිම් මහලේ කඩ කාමර 23ම එක් ඉල්ලුම්කරුවකුට බදු දීමට එවක සිට් මහා නගර සභා පාලනාධිකාරිය තීරණය කළේ කුමන පදනමක් යටතේදැයි මෙම විගණන විමසුමෙන් ප්‍රශ්න කර තිබෙන බවද දිනමිණ වෙබ් අඩවිය වැඩිදුරටත් වාර්තා කර සිටි.
මෙම කඩ කාමර 29 කින් 2023.12.31වන දිනට රුපියල් කෝටි 9කට අධික මුදලක් අයවීමට තිබෙන අතර බදුකරුවන් එම ගෙවීම් පැහැරහැර තිබෙන බව එහි සඳහන් කර ඇත. ඊට අදාළ දඩ මුදල් හෝ කී මනී ගෙවීම් ද අවසන් කර නොතිබීම සැලකිල්ලට ගෙන එම කඩ කාමර නැවත පවරාගෙන නැවත ටෙන්ඩර් කළ යුතු වුවද එසේ කිරීමට ද කුරුණෑගලමහ නගර සභාවේ බලධාරීන් කටයුතු කර නොමැති බවත් මෙම විගණන වාර්තාවේන් හෙළිදරව් කර තිබේ.
මේ ලෙස ගත් කළ දිනමිණ වෙබ් අඩවිය සඳහන් කරන පරිදි මෙම විගණන වාර්තාව හරහා කුරුණෑගල මහ නගර සභාවට අයත් සාප්පු සංකීර්ණ සතු කඩ කාමර බදු දීමේදී තවත් අක්‍රමිකතා රැසක් සිදුව තිබේ. නීත්‍යානුකූල නොවන , විනිවිද භාවයකින් තොරව, සහ අවිධිමත් ලෙස මෙම කඩ කාමර බදු දීම හරහා කෝටි ගණනක මුදලක් කුරුණෑගල මහා නගර සභාවට අහිමි වී ගොස් ඇති බව එම විගණන වාර්තාවේ සඳහන් කරුණු පරික්ෂා කිරීමේදී තහවුරු වී ඇතැයි දිනමිණ වෙබ් අඩවියේ වැඩිදුරටත් සඳහන් වේ.
ඡායාරූප සහ තොරතුරු උපුටා ගැනීම – දිනමිණ
