කුරුණෑගල – දඹුල්ල මාර්ගයේ බඩගමුව රක්ෂිතය තුළදී මෝටර් රථයක් සහ ලොරි රථයක් මුහුණට මුහුණලා ගැටීමෙන් අද (06 දා) අඵයම සිදු වූ අනතුරකින් එම මෝටර් රථයේ ගමන් කළ බව කියන කාන්තාවක සහ ඇගේ පියා එම ස්ථානයේදීම ජීවිතක්ෂයට පත්වූහ.
මෙලෙස ජීවිතක්ෂයට පත්වූයේ ඉබ්බාගමුව, පන්නල, කොස්ලන්දවත්ත ප‍්‍රදේශයේ පදිංචි තමරා ප‍්‍රියන්ති නැමැති 48 හැවිරිදි කාන්තාවක සහ ඇගේ පියා වන ටී. එම්. ධර්මරත්න නැමැති 96 හැවිරිදි පුද්ගලයෙකි. මියගිය කාන්තාව පන්නල ප‍්‍රදේශයේ ආපන ශාලාවක් පවත්වාගෙන ගිය ප‍්‍රකට ව්‍යාපාරික කාන්තාවක් වෙයි.
වෙන්නප්පුව ප‍්‍රදේශයේ පැවැති ඥාතියෙකුගේ විවාහ මංගල උත්සවයකට සහභාගි වී ආපසු නිවස බලා එමින් සිටියදී අද අඵයම 1.20 ට පමණ මෙම අනතුර සිදු වී තිබේ. අනතුර සිදුවන අවස්ථාව වන විට මියගිය කාන්තාව විසින් මෝටර් රථය පදවා ඇති බවත්, ඇගේ පියා ඉදිරිපස අසුනෙහිත්, සැමියා සහ දරු දෙදෙනා පිටුපස අසුනෙහිත් ගමන්කර ඇති බව මූලික පොලිස් පරීක්ෂණවලදී හෙළි වී තිබේ. අනතුරින් තුවාල ලැබූ සැමියා, දියණිය සහ පුත‍්‍රයාද කුරුණෑගල ශික්‍ෂණ රෝහලට ඇතුලත් කර සිටින අතර බරපතල තත්වයෙන් පසු වූ පුත‍්‍රයා එහි දැඩි සත්කාර ඒකකයට මාරුකර යවා තිබේ.
ලොරි රථයේ රියදුරු අනතුර සම්බන්ධයෙන් සැකපිට අත්අඩංගුවට ගෙන ඇති අතර රිය පැද වූ කාන්තාවට නින්දයාම අනතුරට හේතුවන්නට ඇති බවට පොලිසිය සැකකරයි. කුරුණෑගල මූලස්ථාන පොලිසිය අනතුර පිළිබද වැඩිදුර පරීක්ෂණ සිදුකරයි.
