ගොකරැල්ල, නින්දපැල්ල ප‍්‍රදේශයේදී මහමග ධාවනය වෙමින් තිබූ යතුරු පැදියක් මතට පොල් ගසක් කඩාවැටීමෙන් එම යතුරුපැදියේ පසුපස ගමන්කරමින් සිටි පුද්ගලයෙකු ඊයේ (16 දා ) රාත‍්‍රියේ එම ස්ථානයේදීම ජීවිතක්ෂයට පත් විය.
මෙලෙස ජීවිතක්ෂයට පත්වූයේ ගොකරැල්ල, ගොඩරත්මලේ ප‍්‍රදේශයේ මහසෙන් ආරච්චිලාගේ ඉන්ද්‍රරත්න නැමැති 46 හැවිරිදි දෙරු පියෙකි.
මෙම පුද්ගලයා තම ඥාති ප‍්‍රත‍්‍රයෙකු විසින් පැදවූ යතුරු පැදියක නැගී ගමන් කරමින් සිටියදී මාර්ගය අයිනේ තිබූ පොල්ගසක් හිස මතට කඩාවැටී තිබේ. පොල් ගස කඩාවැටීම නිසා හිසට සිදු වූ බරපතල තුවාල සහිතව එම පුද්ගලයා එතැනදීම ජීවිතක්ෂයට පත් වී ඇති නමුත් ඔහු සමග ගමන් කරමින් සිටි ඥාති ප‍්‍රත‍්‍රයාට කිසිදු තුවාලයක් සිදු වී නැත. කම්පන තත්වය හේතුවෙන් එම තරුණයා මේ වන විට ගොකරැල්ල දිසා රෝහලට ඇතුළත් කර සිටී. අනතුරින් මෙම පුද්ගලයින් දෙදෙනා ගමන් කරමින් සිටි යතුරුපැදියට කිසිදු හානියක් සිදු වී නොතිබීමද විශේෂත්වයකි.
කඩාවැටුණු පොල්ගසේ මූල පද්ධතිය පොළව මතුපිට පිහිටා තිබූ බව දැකගත හැකි වූ අතර ඇදහැලෙමින් පවතින අධික වර්ෂාව හේතුවෙන් මුල් බුරුල් වී ගස කඩා වැටෙන්නට ඇති බව අනතුර පිළිබද පරීක්ෂණ පවත්වන ගොකරැල්ල පොලිසිය සැකකරයි.
