ජල ව්‍යාපෘතියකට ජලය සැපයෙන නල ළිදක් නිදහස් කරන ලෙසට ඉල්ලමින් පසුගිය 18 වැනිදා කුඹුක්ගැටේ නගරයේදී උද්ඝෝෂණයක යෙදුණු ගම්වාසීන් අතරින් 15 දෙනෙකු කුඹුක්ගැටේ පොලිසිය මගින් අත්අඩංගුවට ගෙන පෙරේදා (22 දා) අධිකරණය වෙත ඉදිරිපත් කළහ.
අදාල නල ළිද පිහිටි ඉඩමට බලහත්කාරයෙන් කඩා වැදී අයුතු ඇතුල්වීමක් සිදුකළ බවට චෝදනා කරමින් පොලිසිය මගින් මෙම පිරිස අත්අඩංගුවට ගෙන තිබිණි. අත්අඩංගුවට ගත් ගම්වාසීන් පිරිස බස් රථයක නංවාගෙන පෙරේදා දහවල් කුරුණෑගල අධිකරණ සංකීර්ණය වෙත රැගෙන එනු ලැබීය. අධිකරණයට ඉදිරිපත් කෙරුණු ගම්වාසීන් පිරිස එක් අයෙකුට රුපියල් ලක්ෂයක ශරීර ඇපය බැගින් මුදාහරින ලෙසට කුරුණෑගල අතිරේක මහේස්ත්‍රාත් නාමල් පෙරේරා මහතා නියෝග කළේය. මෙම නඩුව ජූනි මස 07 වැනිදා යළි කැදවීමට නියමිතය.
ගම්වාසීන් පිරිස කුරුණෑගල අධිකරණ සංකීර්ණය වෙත රැගෙන ආ අවස්ථාව පහත වීඩියෝවෙන් දැක්වෙයි.
