(8.57am) අරාබි පාසලක ආයුධ පුහුණුව ලබා දුන් බවට, මුස්ලිම් දරුවන් තිදෙනකුගෙන් බලහත්කාරයෙන් සාක්ෂි ලබා ගැනීමේ උත්සාහයක් සම්බන්ධයෙන් පොලිස් ප්‍රධානීන් වගඋත්තරකරුවන් කරමින් ශ්‍රේෂ්ඨාධිකරණයට පෙත්සමක් ගොනුකර තිබේ.
අම්පාර දිස්ත්‍රික්කයේ, කාරෙයිතීවු හි අල් සුහ්රියා අරාබි පාසලේ ඉගෙනුම ලබන ශිෂ්‍යයන් තිදෙනෙක් ශ්‍රේෂ්ඨාධිකරණය ඉදිරියේ මූලික අයිතිවාසිකම් පෙත්සම් ගොනු කරමින් ප්‍රකාශ කර ඇත්තේ, පොලිස් නිලධාරීන් යැයි හදුන්වා ගත් පිරිසක් විසින් තමන් දෙමාපියන්ගෙන් වෙන් කර ව්‍යාජ තොරතුරු සඳහන් ලිපි වලට අත්සන් කරන ලෙස තර්ජනය කළ බවයි.
මේ සම්බන්ධයෙන් දිර්ඝ විස්තරයක් සදහන් කර ඇති www.ceylonnews.lkවෙබ් අඩවිය විසින් සදහන් කොට ඇත්තේ 13 හැවිරිදි එක් දරුවෙකු තමන්ව අප්‍රේල් 26 හා අප්‍රේල් 28 දිනයන්හි දී මෙසේ තමා නොදන්නා ස්ථානයකට රැගෙන ගොස් ප්‍රශ්න කිරීමට ලක් කළ බවට ප්‍රකාශ කර ඇති බවයි.
උපුටා ගැනීම
එම පෙත්සමේ සදහන් පරිදි පවුලේ පවතින ආර්ථික දුෂ්කරතා හේතුවෙන් පාසල් ගමන අතර මග නතර කරන්නට සිදු වූ මෙම දරුවාගේ දිළිදු බව ප්‍රයෝජනයට ගනිමින් ඔහුව නීති විරෝධී වැඩ වලට යොදා ගැනීමට ප්‍රදේශයේ යම් පුද්ගලයන් උත්සාහ දරා තිබේ.
එවන් තත්වයක් තුළ ප්‍රදේශයේ පල්ලියේ සාමාජිකයකු විසින් දරුවාගේ පියාට දන්වා ඇත්තේ මෙවැනි පුනරුත්ථාපනයක් අවශ්‍ය දරුවන් සදහා අධ්‍යාපන ශිෂ්‍යත්වයක් ලබා දීමට අධ්‍යාපන ආයතනයක් ඉදිරිපත් වී ඇති බවයි.
ඒ අනුව අල් සුහ්රියා අරාබි පාසලට ඇතුලත් කළ දරුවා එහිදී ඉස්ලාම් ආගම, ගණිතය, ඉංග්‍රීසි හා පරිගණක අධ්‍යාපනයද ලබා තිබෙන අතර පාසල් නිවාඩු කාලයන්හි දී තම නිවසට පැමිණ තිබේ.
එසේ නිවසේ සිටියදී, අපරාධ පරීක්ෂණ දෙපාර්තමේන්තුවේ යැයි හදුන්වා ගත් පිරිසක් නිවසට පැමිණ ප්‍රශ්න කළ බව මෙම දරුවා සිය පෙත්සමෙහි සදහන් කර තිබේ.
ආයුධ පුහුණුව
තමන් අපරාධ පරීක්ෂණ දෙපාර්තමේන්තුවේ යැයි හදුන්වා ගත් පිරිස විසින් පාසලේදී ආයුධ පුහුණුව ලබා දුන්නේදැයි මෙම දරුවාගෙන් ප්‍රශ්න කර ඇති අතර දරුවා විසින් එය ප්‍රතික්ෂේප කර තිබේ.
එම පිරිස විසින් නන්නාඳුනන පුද්ගලයන්ගේ ඡායාරූප පෙන්වා, ඔවුන් තමා ඉගෙනුම ලබන පාසලට පැමිණෙනවාද හෝ එහි උගන්වනු ලබනවා දැයි ප්‍රශ්න කර ඇති අතර, තම ශිෂ්‍ය කාලය තුළ තමන්ට අධ්‍යාපනය ලබා දුන් ගුරුවරුන් හැර වෙනත් කිසිදු පුද්ගලයකු සම්බන්ධයෙන් තමන්ට අවබෝධයක් නැති බව දරුවා ප්‍රකාශ කළද අපරාධ පරීක්ෂකයන් යැයි හදුන්වාගත් පිරිස විසින් කරන ප්‍රකාශ පිළිගන්නා ලෙස දරුවාට බලපෑම් කර ඇති බව පෙත්සමෙහි වැඩි දුරටත් සඳහන්ය.
“පෙත්සම්කරුට හදුනා ගැනීමට නොහැකි වූ සහ ඇත්ත වශයෙන්ම පෙත්සම්කරු දැනුවත්ව නොසිටි පුද්ගලයන්, අන්තවාදී හා ප්‍රචණ්ඩ අදහස් දේශනා කිරීමට හා ඉගැන්වීමට පාසලට පැමිණෙන්නේ යැයි පිළිගන්නා ලෙස පෙත්සම්කරුට බල කෙරිණි.”
ඉන්පසුව, තමන් අපරාධ පරීක්ෂණ දෙපාර්තමේන්තුවේ නිලධාරීන් යැයි හදුන්වා ගත් පිරිස විසින් දෙමාපියන්ට දන්වා ඇත්තේ දරුවා ප්‍රශ්න කිරීම සදහා රැගෙන යන බවයි.
එහිදී කිසිදු අත් අඩංගුවට ගැනීමක් සම්බන්ධයෙන් හෝ දරුවා රැගෙන යන්නේ කුමන ස්ථානයකට දැයි දැනුවත් කිරීමක් සිදු කර නොමැති අතර, 13 හැවිරිදි දරුවා සමග පැමිනීමට දෙමාපියන්ටත් ඉඩ ලබා දී නොමැත.
“ඉන් පසුව එකී පුද්ගලයන් විසින් පෙත්සම්කරුව වාහනයක දමාගෙන රැගෙන යනු ලැබිණ. තමන් රැගෙන ගිය ස්ථානය පිළිබදව පෙත්සම්කරුට දැනුවත් භාවයක් නොවීය. එම නියෝග වලට අවනත වෙනු හැර වෙනත් විකල්පයක් පෙත්සම්කරුට නොතිබූ අතර ඔහුගේ ඔබ මොබ යාම සීමා කෙරිණි,”යි අධිකරණයට ඉදිරිපත් කළ පෙත්සමෙහි වැඩි දුරටත් සදහන්ව තිබේ.
කාමරයක දමා වීඩියෝ කරලා
එම ස්ථානයේදී කාමරයකට රැගෙන ගිය දරුවාගෙන් නැවතත් පින්තූර පෙන්වමින්, නිවසේදී සිදු කළ අයුරින්ම ප්‍රශ්න කර ඇති අතර එය වීඩියෝ ගත කළ බව දරුවා ප්‍රකාශ කරයි.
පාසලේදී ආයුධ පුහුණුව ලැබුවේද යන්න නැවතත් ප්‍රශ්න කර ඇති අතර, පෙර සේම දරුවා එය ප්‍රතික්ෂේප කර තිබෙන අතර ප්‍රශ්න කරන අතරවාරයේදී යම් යම් අවස්ථා වලදී වීඩියෝ කැමරාවේ පටිගත කිරීම නවත්වන ලද බව ද දරුවා දැක තිබේ.
ඉන් පසුව එම පිරිස විසින් ආයුධ පුහුණුව ලැබු බව පිළිගන්නා ලෙස දරුවාට තර්ජනය කර තිබේ.
“ඡායාරූප වල පෙන්වන ලද පුද්ගලයන් විසින් දේශනා පැවැත්වූ බව සහ/හෝ ආයුධ පුහුණුව ලැබී බව ඔහුගේ සගයන් පිළිගත් බව පෙත්සම්කරුට දන්වනු ලැබීය. ඔහුට සැබවින්ම ඉගැන්වීම් නොකළ එවැනි පුද්ගලයන් පිළිබද අවබෝධයක් ඇති බව පෙත්සම්කරු ප්‍රතික්ෂේප කළේය.”
මෙසේ පැය 10 ක් පමණ ප්‍රශ්න කිරීමෙන් අනතුරුව දරුවාට යම් ලියවිල්ලක සිය අත්සන තබන ලෙස නියෝග කර ඇති බව නීතිඥ ප්‍රබුද්ධිකා තිසේරා මගින් අධිකරණයේ ගොනු කර තිබෙන පෙත්සමේ වැඩි දුරටත් සදහන්ය.
“ඉන්පසුව කොළයක අත්සන් කරන ලෙස පෙත්සම්කරුට අණ කෙරිණි. පෙත්සම්කරුට (ලිපියෙහි) අඩංගු කරුණු සම්බන්ධයෙන් සහ / හෝ ඔහුගේ අත්සන ලබාගැනීමට හේතුවක් සම්බන්ධයෙන් දැනුවත් කිරීමක් සහ/හෝ පැහැදිළි කිරීමක් නොකෙරිණි.”
දරුවා ආපසු නිවෙසට රැගෙන ගොස් ඇත්තේ ඉන් අනතුරුවය.
නිල ලියැවිලි කෝ?
මෙම පෙත්සම මගින් පෙත්සම්කරුවා ප්‍රකාශ කර සිටින්නේ ව්‍යවස්ථාවේ 11 වැනි වගන්තියෙන් සහතික කොට ඇති වධ හිංසාවකට හෝ කෘර අමානුෂික හා අවමන් සහගත සැළකිල්ලකට භාජනය නොවීමේ මූලික අයිතිවාසිකමද, 12 (1) වගන්තියෙන් සහතික කොට ඇති නීතිය ක්‍රියාත්මක කිරීම හා නීතියේ රැකවරණය සර්ව සාධාරණ විය යුතුය යන මූලික අයිතිවාසිකමද, 13(1) වගන්තියෙන් සහතික කර ඇති නීතියෙන් නියම කර ඇති ක්‍රියාපටිපාටියට බාහිරව අත් අඩංගුවට ගැනීම නොකළ යුත්තේය හා අත් අඩංගුවට ගන්නා හේතුව දැනුම් දිය යුත්තේය යන මූලික අයිතිවාසිකමද, 13(2) වගන්තියෙන් සහතික කර ඇති, අත්අඩංගුවට ගන්නා පුද්ගලයා නිසි අධිකරණයට ඉදිරිපත් කර විනිශ්චයකාරවරයාගේ ආඥාවකින් තොරව අත්අඩංගුවේ තබා නොගත යුතුය යන මූලික අයිතිවාසිකම හා 14 (1) (ඉ) වගන්තියෙන් සහතික කර ඇති ආගම ඇදහීමේ, ප්‍රගුණ කිරීමේ හා ඉගැන්වීමේ අයිතිවාසිකම වගඋත්තරකාර පුද්ගලයින්ගේ ක්‍රියාකාරකම් හෝ පැහැරහැරීම් හේතුවෙන් උල්ලංඝණය වන බවයි.
ඒ අනුව, මෙම පෙත්සම මගින් දරුවා අධිකරණයෙන් ඉල්ලා සිටින්නේ, තමන් අත් අඩංගුවට ගැනීමේ දැන්වීම හෝ රදවා ගැනීම සම්බන්ධයෙන් වන මොනයම් හෝ ලේඛණයක්, බලහත්කාරයෙන් තමන්ගේ අත්සන ගන්නා ලද ලිපිය හා වීඩියෝ පට අධිකරණයට ඉදිරිපත් කරන ලෙස පොලීසියට නියෝග කරන ලෙසයි.
නීතිඥ ප්‍රබුද්ධිකා තිසේරා විසින් අධිකරණයේ ගොනු කර ඇති මෙම පෙත්සම් මගින්, වැඩ බලන පොලිස්පති චන්දන වික්‍රමරත්න, අපරාධ පරීක්ෂණ දෙපාර්තමේන්තුවේ අධ්‍යක්ෂක ජ්‍යෙෂ්ඨ පොලිස් අධිකාරී ඩබ්ලිව්. තිලකරත්න සහ නීතිපතිවරයා වගඋත්තරකරුවන් ලෙස නම් කර තිබේ.
මේ වන විට බරපතල මානසික කම්පනයකට ලක්ව ඇති දරුවා, අධිකරණයෙන් තමන් අයැදින එම අතුරු සහනයන් නොලැබුනහොත් තමන්ට හා තම පවුලට බරපතල හානියක් විය හැකි බවට බියෙන් පසු වන බව එම පෙත්සමේ වැඩි දුරටත් සදහන්ය.
දරුවාගේ දෙමාපියන් විසින් මේ වන විට මානව හිමිකම් කොමිසම වෙතද පැමිණිල්ලක් ගොනු කර තිබේ.
www.ceylonnews.lk
